Panelsamtale: Den store kjøkkenpraten

Kva skal skje?  

Michelle Zhao, Live Krangnes Edvardsen og André Løvaas arbeider med mat kvar dag. I denne samtalen møtest dei for å snakke om kvar det heile starta, kven dei har lært handverket av, og kvifor dei blir verande ved kjøkkenbenken. Det blir ein samtale om råvarer, teknikkar og tradisjonar leidd av Andreas Liebe Delsett. Noko av samtalen går føre seg på engelsk. 

Kven møter du?  

Michelle Zhao er ein sjølvlært kokk som driv den kritikarroste restauranten Banzha i Bergen. Ho lagar mat sterkt inspirert av Yunnan-provinsen i Kina, men tilpassa norske råvarer. Ho driv òg bloggen No sweet sour og har gitt ut boka Hjemmelaget kinesisk.  

Live Krangnes Edvardsen er kokk og tidlegare kjøkkensjef ved Credo i Trondheim. Ho har vore dommar i TV-programmet Masterchef unge talenter og mentor på Kokkeskolen. I fjor kom ho med boka Fra mormors kjøkken, der ho hentar fram norsk tradisjonsmat og husmannskost.  

Diplombakar André Løvaas er kjend for mange som ein av dommarane i Bakemesterskapet på NRK. Han er til dagleg produktutviklar hos Åpent bakeri.  

Andreas Liebe Delsett er forfattar og matentusiast. Han har gitt ut to bøker om mat, Kjøkkenveien – en bok om mat og arbeid (2019) og Den vanskelige maten (2020). I haust skal han leie arrangementsserien Kokepunktet hos Nasjonalbiblioteket, som skal handle om norsk restauranthistorie.  

Når og kvar? 

Fredag 18. september kl. 18–19    

Nasjonalbiblioteket, Målstova  

Inngang frå Henrik Ibsens gate 110   

Slik kjem du deg hit: Besøk Nasjonalbiblioteket!

   

Treng du billett?    

Arrangementet er gratis, men du må ha billett for å sikre deg plass. Hent billett her:  Hent billett!

Strøyming av arrangementet? 

Vi strøymer arrangementet HER, og opptaket ligg ute i 14 dagar HER. 

  

Mat og drikke? 

Credo gir publikum ved Nasjonalbiblioteket eit serveringstilbod som er forankra i norsk matkultur. Nasjonalbibliotekbaren, bakeriet og kantina tilbyr forfriskingar og smårettar og bakst.  

Handverksfestivalen

Handverksfestivalen på Nasjonalbiblioteket er ein årleg festival som løftar fram den materielle kulturarven vår og kunnskap som har gått frå hand til hand gjennom generasjonar. Festivalen i år er den femte i rekkja og vi byr på ei rekkje arrangement over to dagar, fredag 18. og laurdag 19.
september.  Sjå heile programmet her!

Velkomen!