Marilynne Robinson held Fosseforedraget 2026

Den amerikanske forfattaren Marilynne Robinson er invitert til å halde Fosseforedraget, og den nederlandske omsetjaren Paula Stevens er vinnar av Fosseprisen for omsetjarar i 2026.

Dette kjem fram i ei pressemelding frå Kultur- og likestillingsdepartementet 21. januar.

– Vi ser fram til å heidre dei begge under Fosseforedraget og Fosseprisen i Oslo i april, seier kultur- og likestillingsminister Lubna Jaffery.

– Marilynne Robinson er ein eigenarta forfattar og tenkjar som skriv med ei sterk tru på mennesket og den krafta som bur i oss. Prisvinnar Paula Stevens har gjennom sitt livsverk med omsetjing og formidling spela ei avgjerande rolle i å bringe norsk litteratur ut til nye lesarar, held Jaffery fram.

Fosseforedraget og Fosseprisen for omsetjarar vart oppretta av regjeringa som ei heidring av nobelprisvinnar i litteratur Jon Fosse. Det årvisse arrangementet finn stad for andre gong og er i regi av Nasjonalbiblioteket.

Foredrag og prisutdeling på Slottet

Den Høgvørde Kronprinsesse Mette-Marit er kongeleg beskyttar for utmerkingane. Etter invitasjon frå Kongehuset vil Fosseforedraget og utdelinga av Fosseprisen finne stad på Slottet torsdag 23. april 2026.

– Vi er svært takksame og glade for engasjementet til kronprinsessa og for at Kongehuset nok ein gong opnar dørene til Slottet for den litterære samtalen gjennom Fosseforedraget og Fosseprisen, seier direktør for kulturformidling ved Nasjonalbiblioteket Eline Skaar Kleven.

I år, som i fjor, vil fleire titals «eldsjeler» frå heile landet bli inviterte til arrangementet på Slottet – denne gongen saman med ei rekkje litteraturentusiastar og interessefellar frå andre land.

Publikum vil også kunne følgje foredraget og prisutdelinga på strøyming eller i eit parallelt arrangement på Nasjonalbiblioteket.

Publikumsprogram på Nasjonalbiblioteket

I dagane før og etter foredraget og utdelinga på Slottet blir det ei eiga arrangementsrekkje på Nasjonalbiblioteket der du kan bli nærare kjent med Marilynne Robinson og Paula Stevens.

– Dette er første gong Marilynne Robinson står på ei norsk scene. Paula Stevens har vore i Noreg mange gonger, men som omsetjar har ho opphalde seg meir bak enn på scena.

No får publikum eit eineståande høve til å bli kjent med dei begge, seier Martine Jonsrud, ansvarleg for Fosseforedraget og Fosseprisen for omsetjarar.

Gratisbillettar til arrangementa på Nasjonalbiblioteket kan hentast ut fire veker i forkant, på nb.no. Fullt program er tilgjengeleg frå 27. januar.

Marilynne Robinson (f. 1943) er ein amerikansk forfattar og essayist, særleg kjend for den prislønte Gilead-kvartetten. Ho har doktorgrad i engelsk litteratur og har undervist i kreativ skriving ved Iowa Writers’ Workshop. Robinson er omsett til 36 språk og blir rekna som ein av dei fremste litterære tenkjarane i vår tid, med essay og romanar som krinsar rundt tru, nåde, fellesskap og menneskeverd. Ho er mottakar av ei rekkje store litterære prisar, mellom anna Pulitzerprisen, og blir jamleg nemnd i samband med nobelprisen i litteratur.

Det er Nasjonalbiblioteket og Jon Fosse som har peika ut foredragshaldaren etter innspel frå Fosserådet og ei rekke nasjonale og internasjonale aktørar.

– Marilynne Robinson forsvarar det åndelege i mennesket i ei tid der vi, etter hennar syn, har ein tendens til å redusere oss sjølve til noko målbart – som biologi, politikk eller økonomi. Ei felles interesse for tru og vilkåra for menneskeleg eksistens gir òg forfattarskapen hennar subtile band til Jon Fosse. Vi har høge forventningar til foredraget hennar, seier Martine Jonsrud.

Paula Stevens (f. 1955) er ein framståande nederlandsk omsetjar og ein sentral formidlar av norsk litteratur til eit nederlandskspråkleg publikum. Sidan 1982 har ho omsett nær 90 bøker frå norsk, mellom anna verk av Karl Ove Knausgård, Lars Mytting, Roy Jacobsen og Åsne Seierstad. Gjennom fire tiår har Stevens hatt avgjerande betydning for utbreiinga og forståinga av norsk litteratur i Nederland, og ho har òg spela ei nøkkelrolle i rekruttering og opplæring av nye omsetjarar. Ho er tildelt ei rekkje prestisjetunge prisar.

NORLA (Norwegian Literature Abroad) er det faglege rådet for utdelinga av omsetjarprisen, som er den største omsetjarprisen i verda i sitt slag. Prisvinnaren er peika ut av Nasjonalbiblioteket og Jon Fosse i samråd med NORLA.

– Paula Stevens står i ei særstilling som omsetjar og formidlar av norsk litteratur til eit utanlandsk publikum. Dette, saman med innsatsen for rekruttering til omsetjaryrket, gjer henne til eit naturleg val som mottakar av Fosseprisen, seier direktør i NORLA, Margit Walsø.

Meld deg på vårt nyhendebrev!

Få oppdateringar om Fosseforedraget og Fosseprisen! Nyhendebrevet er på engelsk for å gjere innhaldet tilgjengeleg for lesarar over heile verda.