Tilbud til skoler

I september arrangerer Nasjonalbiblioteket handverksfestival for fjerde gong! Årets tema er havet. I eit eige skuleprogram inviterer vi vidaregåande elevar frå naturbruk, restaurant- og matfag og handverk, design og produktutvikling (KDP) til å delta på tre ulike verkstadar. Her lærer elevane både praktisk handverk og historie.

Nasjonalbiblioteket har eit veksande digitalt tilbod til bruk i klasserommet. Halvparten av foredraga har også tilhøyrande oppgåvesett utarbeida for ein dobbelttime.

I haust lanserer vi tre nye filmar som utforskar kvar sine tema: den norske utvandringa til USA, barokkdiktaren Dorothe Engelbretsdotter og norsk mellomalder. Tidlegare populære foredrag om tema som ytringsfridom, krigsjournalistikk og litteraturhistorie vil også vere tilgjengelege. Her kan du sjå heile det digitale tilbodet.

I år er det 200 år sidan utvandringa frå Noreg til Amerika starta. Mange nordmenn var jordbrukarar og busette seg i dei rurale, vestlege grenseområda av USA – på land som inntil nyleg hadde vore busett av urfolket. På besøk i utstillinga Rett vest. Drømmen om et bedre liv i Amerika lærer elevane om kvifor nordmenn reiste, og om kva for samfunn og realitetar som møtte innvandrarane til «den nye verda».

I dei permanente utstillingane Opplyst. Glimt frå ei kulturhistorie og kartsenteret tilbyr vi fleire omvisingar med ulike tematiske ruter. I Opplyst finst det seks ulike omvisingar å velje mellom, og i kartsenteret tre. Trykk her for å sjå fullstendig omvisingstilbod.

Under besøket blir klassene delt i to grupper. I  tillegg til omvising i utstillinga, deltek dei også på eit undervisningsopplegg tilpassa tematikken.