Samlinga inneheld trykt materiale i form av bøker, aviser, tidsskrift, småtrykk,  kart, plakatar, musikaliar, grafikk, og dessutan handskrift i form av brev, manuskript og notar, teikningar, handteikna kart m.m.

Preventiv bevaring
Preventiv bevaring er kontroll av det fysiske miljøet kring materialet, oppbevaringsforhold og handtering. Formålet er å hindre eller redusere nedbrytande og øydeleggjande faktorar. Oppbevaringsforholda har alt å seie for bevaring av papirbasert materiale. Det er tre tommelfingerreglar som gjeld: mørkt, tørt og kjølig.

Emballasje
Emballasjen skjermar innhaldet mot eksterne nedbrytingsfaktorar som luftforureining og støv, og dempar til ein viss grad den nedbrytande effekten av variasjonar i temperatur og RH. Emballasjen vernar òg innhaldet under handtering og transport av materialet.
Val av rett emballasje medverkar til å forlengje levetida til materialet. For alle medietypane er det rådd til omslag og esker av arkivhaldbar kvalitet basert på behova til dei ulike media. Kvaliteten er definert i internasjonale standardar og tilrådingar.

Kopiering
Ulike former for kopiering har vore nytta og blir nytta for å produsere kopiar av materiale som ein av forskjellige grunnar ikkje kan låne ut eller bruke. Mikrofilming, fotostatkopiering og digitalisering er førebyggjande tiltak som skjermar originalar frå handtering.

Oppbevaring og handtering av bøker
Bøker utgjer ein vesentlig del av kvardagen vår. Vi tenkjer sjeldan over kor forgjengelege bøkene er før dei brått fell frå kvarandre i hendene våre. Motstandsevna til bøkene har direkte samanheng med den behandlinga dei blir utsette for. Materiala som bøker består av, er i det vesentlege organiske, og som alt anna organisk materiale endrar dei seg og blir brotne ned over tid. Tilstanden til materiala og produksjonsmåte avgjer om aldrings- og nedbrytingsprosessane skjer raskt eller seint. Rett handtering og gunstige oppbevaringsforhold forlengjer levetida til materialet.

Veiledning i oppbevaring og handtering av bøker , av Nina Hesselberg-Wang

Kontakt
Seksjonsleiar Arthur Tennøe